NHIF WAZINDUA VIFURUSHI VYA BIMA YA AFYA KWA WAANDISHI HABARI NCHINI

NHIF WAZINDUA VIFURUSHI VYA BIMA YA AFYA KWA WAANDISHI HABARI NCHINI Nov 02, 2020

Mfuko wa taifa wa Bima ya afya (NHIF) umezundua rasmi vifurushi vya bima ya afya kwa waandishi wa habari, ili kuwa rahisishia upatikanaji wa matibabu kipindi watakapougua na kuokoa afya zao.


Zoezi hilo limefanyika leo kwenye Ofisi za NHIF Jijini Mwanza, na kuhudhuliwa na wadau wa habari akiwamo Meneja wa TCRA Kanda ya Ziwa Mhandis Francis Mihayo, na Naibu waziri wa ardhi, nyumba maendeleo na makazi Anjelina Mabula ,huku Mgeni Rasmi akiwa mkuu wa mkoa wa Mwanza John Mongella.

Akizungumza kwenye uzinduzi huo mkurugenzi mkuu wa mfuko wa taifa wa bima ya afya Bernard Konga, amesema waandishi wa habari ni kundi muhimu sana katika upataji wa bima hiyo ya afya, ambapo wengi wao hawana ajira rasmi, hivyo itawasaidia kupata matibabu kwa urahisi na kutotumia gharama kubwa.

Amesema awali waandishi wa habari walikuwa wakijipenyeza kujiunga vifurushi vya bima hiyo ya afya kwenye makundi mengine wakiwamo bodaboda, ambapo walikuwa wakiondolewa sababu hawakuwa wahusika.

"Tulikaa na umoja na viongozi wa umoja wa Klabu za waandishi wa habari Tanzania UTPC, tukalizungumza hili suala la kuanzisha vifurushi vya bima ya afya kwa waandishi, na kufikia makubaliano ambapo leo zoezi hili tumelizundua Rasmi," amesema Konga.

"Gharama zake Mwandishi wa habari kukata Kadi ya bima ya afya kwa mwaka mmoja ni Shilingi 100,000 pamoja na wategemezi wao kiasi hicho hicho cha pesa," ameongeza.

Aidha amewataka waandishi wa habari kuchangamkia fursa hiyo, ikiwa kwa sasa bado wanasuasua, ambapo kati ya waandishi wa habari 1,800 waliopo kwenye Press Club, waliokata bima hiyo wapo 65 na wategemezi wao 20.

Pia ametumia fursa hiyo kuwataka watanzania wakate bima hiyo ya afya ili kuwasaidia kupata matibabu bure pale watakapo patwa na maradhi ghafla, na kubainisha Kati ya Watanzania Milioni 60 walio na kadi hizo ni Milioni 4.4.

Naye mgeni Rasmi mkuu wa mkoa wa Mwanza John Mongella, amesema mfuko huo wa bima ya afya umefanya kitu cha muhimu sana kwa kukumbuka muhimiri huo wa Nne usio rasmi kwa kujali afya zao.

Amesema hakuna kitu cha muhimu sana katika maisha ya binadamu kama mtaji wa afya, ambapo bila afya shughuli za kimaendeleo haziwe kufanyika, na kutoa wito kwa waandishi wa habari na watanzania kwa ujumla wakate bima hiyo ya afya.

Kwa upande wake Rais wa umoja wa Klabu za waandishi wa habari nchini UTPC Deogratius Nsokolo, ametaja takwimu za Klabu ambazo zimekata bima hiyo ya afya (NHIF), kuwa Kati ya Klabu 28 zilizopo, 11 tu ndio zimekata bima.

Pia ametaja Takwimu za waandishi wa habari ambao wamekata bima hiyo ya afya NHIF, kwa kila Press Klabu, ambapo Kigoma wamekata 17, Mwanza 16, Mbeya 11, Shinyanga 11, Zanzibar 8, Dodoma 5.

Ameendelea kutaja Dare es salam waandishi waliokata bima ni 3, Rukwa 1, Simiyu 2, Katavi 2, huku akiziagiza Klabu kuendelea kuhamasisha waandishi wa habari kujiunga na vifurushi hivyo hata kwa kuchangia fedha kidokidogo.

Mkuu wa mkoa wa Mwanza John Mgongella, akizungumza kwenye uzinduzi wa vifurushi vya bima ya afya kwa waandishi wa habari.

Mkurugenzi mkuu wa mfuko wa taifa wa bima ya afya NHIF Bernard Konga, akizungumza wakati wa uzinduzi wa vifurushi vya bima ya afya kwa waandishi wa habari.